Joomla Sport Template

Промотерот на Формула 1, Берни Еклстоун, најави дека трката за Големата награда на Рим ќе биде вклучена во календарот од 2013 година.

Она што е предмет на натамошна дискусија е фактот дека тимовите имаат договор за настап во светското првенство на Формула 1 до 2012 година, откако лани го потпишаа новиот договор со кој се регулираат правата и обврските меѓу учесниците и организаторите. Во својот медиумски настап, кај германскиот магазин Спидвик, Еклстоун најавил дека од 2013 година во Формула 1 ќе дебитира и календарот во кој ќе има 20 трки годишно.

- Рим ќе се најде во календарот од 2013 година. Ќе имаме 20 трки, а екипите ќе бидат среќни поради тоа,- вели 79-годишниот бизнисмен.

Со тоа се отвораат шпекулации дека во 2011 или 2012 нема да има нови трки, бидејќи календарот сега брои 19 настани, а оваа година дебитира Јужна Кореја. Од друга страна, на ред за влез во Формула 1 чекаат земји како Индија и Русија, а свои амбиции најави и Катар. Тоа создава притисок за местата на одреени организатори како Кина и Турција, кои му се приклучија на „циркусот“ пред нешто повеќе од пет години, а сега им се ближи рокот за продолжување на договорите иако очекуваните финаниски резултати од големите инвестиции се уште не се постигнати.

Кога е во прашање трката во Рим, најмногу опонирање всушност имаше од бизнис-лобито од северниот дел на Италија, каде што спаѓа Монца, и од каде што се корените на Ферари. Претседателот на ергелата од Маранело, Лука ди Монтеѕемоло во повеќе наврати предупреди дека таа трка не смее да се случи на штета на Монца, а слично се постави и градоначалничката на Милано, Летиција Морати.

- Конкуренцијата меѓу двата града е исправна, но еднакво е коректно да се почитуват традициите,- вели таа.

Нејзиното вклучување во целиот настан се претпоставува дека доаѓа поради семејните релации од нафтенот бизнис, бидејќи таа е сопруга на Џанмарко Морати, кој со брат му Масимо (патем и сопственик на фудбалскиот клуб Интер), ја раководи групацијата Сарас, која има своја рафинерија во Сардинија.